“Herritarren erabaki ahalmenean sinesten dugulako denok elkarrekin erabakiko dugu Zumardian zer egin”

Hainbatek egindako kritiken aurrean herritar batzuk zer gertatzen ari den galdetzen ari dira, eta horren aurrean Udal Gobernuak argipenak eman nahi dizkie herritarrei. 

Argi dugu Debak urratsak egin behar dituela etorkizunera begira, ezin dugula denborak aurrera egingo ez balu bezala jokatu, eta gure herria iraganari lotuta utzi, aurrera ez egitea, atzera egitea delako. Herrian gauzak ditugu konpontzeko, eta Zumardiaren esparrua da horietako bat. Herritarren mugikortasunean eta irisgarritasunean hutsuneak ditugu herrian, eta herritarrek merezi dute horiek hobetzea.

Prozesu honi dagokionez, hasieratik aritu gara elkarlanean udaleko alderdi guztiekin, eta hasieratik izan dira herritarrak prozesuaren parte. Eta orain arte hartutako erabakiak herritarrekin eta udalbatzako gainontzeko alderdiekin batera hartu ditugu.

Eta puntako aholkularitza dugu kooperazio prozesua garatzeko eta goi mailako talde teknikoa: udal arkitektoa, Debegesako arkitektoa, arkitekto urbanista, ingeniaritza profesionala, eta dinamizatzaile jantziak.

Bide luzea aurreikusten genuen, fase ezberdinetan garatu beharrekoa. Udazkeneko partaidetza saioetan bildutako herritarren ekarpenekin lanketa teknikoa burutu du aipatutako talde teknikoak. Eta oinarrizko proiektua Europako Next Funtsetara aurkeztea sekulako erronka izan da: lan tekniko guztia oso epe laburrean burutu behar izan delako eta horrek erakunde ezberdinen arteko ezinbesteko koordinazioa eskatzen duelako.

Argi utzi nahi dugu, gainera, gaur egun prozesuak oraindik martxan jarraitzen duela: aldaketak izango dituen oinarrizko proiektu bat dugu esku artean, ez definitiboa, batzuk iradokitzen duten moduan. Diru-laguntzak lortzeko aurkeztu dugu, baina denon ekarpenekin aldaketak izango dituena. Eta azken erabakia herritarrekin hartuko dugu, Udal Gobernuak herritarren borondatea errespetatuko baitu. 

Ez ditugu ulertzen neurri gabeko baieztapen batzuk, esaterako, “Zumardia txikituko dute” edo “zuhaitzak botako dituzte”. Esan bezala, azken erabakia hartzeko dago, eta herritarrekin eta udalbatzako alderdiekin batera hartuko dugu. Edota “aukera bat galdu da”, izan ere, aho batez onartu zen faseka burutzea. 

Herritarrengan alarma artifiziala sortzeko mezuak dira. Eta egiteko modu horrek kaltea besterik ez du sortzen.

Guk herritarrei esan nahi diegu lasai egoteko, gauzak ondo egiten ditugula, ondo ari garela, puntako talde teknikoa dugula eta garrantzitsuena, herritarren erabaki ahalmenean sinesten dugula, horregatik denok elkarrekin erabakiko dugu zer egin. 

Oposizioko alderdiei esan nahi diegu zarata mediatikoa ez dela bidelagun ona gauzak ondo egiteko. Politikan denak ez du balio. 

Ikusten dugu oinarrian dagoena eredu talka bat dela. Guk gobernatzeko beste era bat dugu, hori ibilian erakusten ari gara. Ez daukagu beldurrik erabakitzeko ahalmena herritarrekin partekatzeko, are gehiago, horrela egin nahi dugu, partaidetzan benetan sinesten dugulako. 

Halaber, sinesten dugu herrigintzaren eta politikagintzaren oinarria elkarrekin hitz egitea dela. Lan handia egin dugu orain arte, elkarlanean, eta uste dugu batzorde mistoan gauza onak egin ditzakegula Debarentzat eta debarrentzat. 

Batzordean denok dugu tokia eta oposizioari dei egiten diogu gaizki ulertzeak egon badira hitz egiten konpontzera.