Aho batez onartu dira ekainaren 30eko osoko bilkuran landutako gai guztiak

Besteren artean, Zestoako Udala, Zumaiako Udala, Debako Udala eta Itziarko Auzo Udalaren arteko lankidetza hitzarmena onartu zen. Mugakideak dira guztiak, baina udal elkarte desberdinean dago bakoitza. Herri horietan bizi diren biztanle askok lotura estua dute aldameneko herriarekin (ohiturengatik, gertutasunagatik...), eta ondare-gune asko zein industriaguneak hiru udalerrien arteko muga inguruan daude, besteak beste. Lau lan-lerro nagusi zehazten dira: herritarren zerbitzua; sozio-ekonomia; ingurumena; eta kultura eta ondarea.

Itziarren lehen hezkuntza 6. mailara arte bertan egiteko eskaera ere berretsi zuen udalbatzak. Aurten LH2n dauden ikasleek LH6 arte Itziarren bertan ikas dezaten aldarrikatzen da. Lehen Hezkuntzako haurren eskola ibilbide osoa Itziarko eskola berrian izan dadin. EAEko Hezkuntza Sailak gaia esku artean dauka, eta martxan dago udaletxe zaharreko eraikinean eskola egiteko proiektua. Hori gauzatzeko obrak lizitatu eta abian jarrita 2023. urtean bukatuta egongo direla aurreikusten da. Egoera hori dela aintzat hartuta, baloratzen da “momentu ezin hobea dela, alde batetik, herritarren, eta bereziki gurasoen, betidaniko nahia, eta bestetik, eskola berriaren proiektua uztartzeko”. 

Next Generation diru-laguntzetara aurkeztutako proiektuei buruzko hurrengo pausoak zehaztu ziren. 

Ekainaren 28an ospatu den LGTBI+ Harrotasun egunari lotuta adierazpen instituzionala egin zuen udalbatzak egun horretan bertan, eta osoko bilkuran berretsi. Beste adierazpen instituzional bat ere onartu zuen udalbatzak, kasu honetan pertsona errefuxiatuen egoerari dagokiona. 

Bestalde, Osakidetzaren indartzearen aldarrikapenari buruzko mozioa ere onartu zen.