Artzabalgo hilerri berrira bisita gidatuak egingo dira martxoaren lehen hamabostaldian

2022/02/11
Erregelamendua onartuta, lanak amaituta, eta une honetan azken ukituak egiten ari direla, laster zabaltzeko moduan egongo da Artzabalgo hilerri berria. Debako Udalaren asmoa da martxoa amaitu aurretik zabaltzea, eta hala egingo da ezusterik sortu ezean.

Asteon bildu da hilerriaren gaia lantzeko udalean sortutako batzordea, udalbatzako hiru alderdietako ordezkariek eta udal teknikariek osatzen dutena, eta zabaltzea nola egin zehaztu dute. 

Zabaldu aurretik hilerri berria ezagutzeko aukera izango dute herritarrek, martxoaren lehen hamabostaldian egingo diren ate irekien jardunaldi eta bisita gidatuen bitartez. Hilabete hasieran, hilerriari buruzko informazioa biltzen duen argitalpena ere jasoko dute herritarrek etxean, eta haien iritzia eman dezaten bidea ere zabalduko da. Argitalpen horretan bertan emango dira zehaztasunak. 

Hilerri zaharretik berrirako lekualdatzea

Hilerri zaharretik berrirako lekualdatzearen inguruan lanean dihardu aipatutako batzordea, eta hura arduratuko da lekualdatze prozesuaz. Etxeetara banatuko den argitalpenean emango dira lekualdatzearen araudiaren eta irizpideen inguruko zehaztasunak.