Beldur Barik 2025 ikus-entzunezko lehiaketak berdintasunaren alde egitera animatzen ditu Debako gazteak

2025ko urriaren 24a

Lehiaketa 12 eta 20 urte bitarteko gazteei zuzendua dago eta helburu du gazteekin batera hausnarketak eta eztabaidak sustatzea eta gizarte berdinzaleagoa eraikitzeko bidean elkarlana indartzea. Izena emateko epea azaroaren 9ra bitarte dago zabalik eta aurkeztutako lanak Debako Tokiko Lehiaketan ere lehiatuko dira.

Beste urte batez bueltan da Beldur Barik 2025 ikus-entzunezko lehiaketa, gazteen artean indarkeria sexistaren aurrean jarrera kritiko, aktibo eta eraikitzaileak sustatzea helburu duen ekimena. Lehiaketa Euskal Autonomia Erkidegoan bizi edo ikasten duten 12 eta 20 urte bitarteko gazteei zuzenduta dago. Lehiaketaren helburua da berdintasunezko eta indarkeriarik gabeko harremanen eraikuntzan hausnarketa, nesken ahalduntzea eta mutilen inplikazio aktiboa sustatzea. 

Horretarako, parte-hartzaileek ikus-entzunezko lanak aurkeztu behar dituzte, euren egunerokoan indarkeria sexistaren aurrean nola erantzuten duten eta harreman errespetuzko eta berdintsuak nola eraikitzen dituzten erakusten dutenak.

Bideoek gehienez 3 minutuko iraupena izan behar dute, azpitituluak izan behar dituzte (euskaraz edo gaztelaniaz) eta YouTube, Instagram edo TikTok plataformetara igo behar dira. Izen-ematea webgune ofizialean eskuragarri dagoen formularioaren bidez egiten da: www.beldurbarik.eus. 

Eskaerak aurkezteko epea azaroaren 9ko 23:59an amaituko da. 

Sariak eta kategoriak
Adinaren arabera, bi kategoria daude:

• 12-16 urte (2009 eta 2013 artean jaiotakoak

• 17-20 urte (2005 eta 2008 artean jaiotakoak)

Kategoria bakoitzak banakako eta taldeko modalitaterako sariak izango ditu:

• Taldeko saria: 650 €

• Banakako saria: 200 €+ 50 eurotan baloratutako liburu-sorta

Sari bereziak ere emango dira:

• Publikoaren saria: 300 €

• Ikus-entzunezko lan onenaren saria: 300 €

Debako tokiko lehiaketan parte hartzea

Gainera, aurkeztutako lanek lehiaketa orokorrean ez ezik, Debako Tokiko Lehiaketan ere parte hartuko dute. Edizio honetan, Debako Udalak 100 euroko saria emango dio kategoria bakoitzeko lan onenari:

• 1. kategoria: 12 eta 16 urte bitarteko gazteak (2009 eta 2013 artean jaiotakoak)

• 2. kategoria: 17 eta 20 urte bitarteko gazteak (2005 eta 2008 artean jaiotakoak)

Jarrera eraldatzailea

Lehiaketak bereziki baloratzen ditu originaltasuna, mezu kritikoa, hausnarketa kolektiboa edo pertsonala eta euskararen erabilera. Beldur Barik ekimenak gizarte zuzenago eta berdinzaleago batekin kontziente eta konprometituago dauden gazteen benetako adibideak erakutsi nahi ditu.