Bi kontzertu eskainiko dira asteburuan, Deban, Ispilu(h)ari programaren baitan

2025ko abenduaren 17a

Abenduaren 20an, larunbata, 18:00etan, Mursegok musika, performancea eta umorea uztartzen dituen helduentzako ikuskizuna aurkeztuko du. Abenduaren 21ean, igandea, arratsaldeko 17:30etan, Teilatupean-ek familia giroan adiskidetasuna eta aniztasuna bezalako baloreak lantzen dituen bertso-antzerkia eskainiko du.

Asteburu honetan, musikaz eta antzerkiz beteko da Deba Ispilu(h)ari programaren baitanherritarrak artearen eta kulturaren inguruan murgiltzeko, gozatzeko eta elkartzeko bereziki pentsatutako bi proposamenekin.

Ekimen hau aurrekontu parte-hartzaileetatik sortu zen, euskararen erabilera sustatu eta tokiko nortasuna indartuko duen urte osoko kultur jarduera eskaintza bat garatzeko helburuarekin.

Ispiluen gela  izan da kultur programa honen baitan  haur eta helduei zuzendutako hileroko hitzorduen agertokia, non antzerkia, musika edo euskarazko literatura bezalako diziplinak uztartu diren, betiere tokiko kultur eragileen parte-hartzea bultzatuz.

Maite Arroitajauregi – Mursego

Abenduaren 20an, larunbata, 18:00etan, Maite Arroitajauregi artistak —Mursego izenez ezaguna— helduei (12 urtetik aurrera) zuzendutako ikuskizuna eskainiko du, musika, performancea eta umorea uztartuz. Proposamena Markos Gimenoren palindromoetan oinarrituta dago, eta esperimentazio artistikoko ariketa bat da, adierazpen-hizkuntza desberdinak nahasten dituena. Arroitajauregik, bere aldakortasunagatik ezaguna, unibertso eszeniko propioa eraikitzen du soinuaren, hitzezko jokoaren eta ikusizko elementuen bidez. Emanaldi honek palindromoen berrirakurketa libre bat proposatzen du, ikusleei ikuskizun berezi bezain adimentsu batez gozatzeko gonbita eginez, sormenak, kritikak eta umoreak elkarri eskua ematen dioten une batean. Ikuskizuna Ispiluen Gelan eskainiko da. 

Teilatupean

Hurrengo egunean, abenduaren 21ean, igandea, haurren txanda izango da, 17:30ean, Teilatupean antzezlanarekin, hau ere, Ispiluen Gelan. Iraitz Lizarragak sortu eta zuzendutako pieza hau Maren Basterretxeak, Maite Aizpuruak eta Uxue Alkortak antzezten dute. Bertan, hurbiltasunetik eta samurtasunetik abiatuta, funtsezko gaiak jorratzen dira, hala nola adiskidetasuna, zaintza, bizi-ereduen aniztasuna, migrazioa edo etxebizitza duina izateko eskubidea. Jolas eszenikoaren, objektuen manipulazioaren, musikaren eta hitz inprobisatuaren bidez, Teilatupean-ek amets egiteko, pentsatzeko eta familian partekatzeko espazio bat sortzen du. Lanak begirada poetiko eta konprometitua proposatzen du, haurren sentsibilitatearekin konektatzen duena, edukietan sakontasuna galdu gabe.