Bueltan da Debako gabonetako balkoi, leiho eta fatxaden lehiaketa

2024ko azaroaren 27a

Izena ematea abenduaren 2tik 23ra bitartean egin ahal izango da, online, Debako Udalaren webgunean edo Turismo Bulegoan bertan. Lehiaketaren helburua da Debako kaleak zein etxebizitzak Gabon giroan murgiltzea eta girotze lan horretan herritarrak inplikatzea.

Debako Udalak Gabonetako balkoi, leiho eta fatxaden lehiaketa antolatu du bigarren urtez, herriko kaleak eta etxeak gabon giroan murgiltzeko helburuarekin. Lehiaketa honek Debako herritar guztiei aukera ematen die beren balkoiak, leihoak eta fatxadak apaintzeko. Nahi bezala apaindu edota argiztatu ahal izango dituste beren leiho, balkoi zein fatxadak, betiere oinezkoentzat arriskurik sortzen ez badute.

Izena ematea doakoa da, eta abenduaren 2tik 23ra bitartean egongo da zabalik.  Parte-hartzaileek bi aukera izango dituzte izena emateko: Debako Udalaren webgunean dagoen formularioa betez edota aurrez-aurre, Turismo Bulegoan, 10:00etatik 14:00etara, edo telefonoz 943192452 zenbakira deituz.

Parte hartzeko baldintzak

Dekorazioek Gabonetako motiboak izan behar dituzte, eta gehienez urtarrilaren 6ra arte egon beharko dira ikusgai. Parte-hartzaileek, gainera, egindako dekorazioaren argazki bat edo batzuk bidali beharko dituzte turismoa@deba.eus helbidera.

Lehengo urteko irabazleek, halaber, parte hartzeko aukera izango dute, betiere aurreko urteko berdina aurkezten ez badute.

Balorazioa eta sariak

Epaimahaiak parte-hartzaileen sormena eta originaltasuna baloratuko ditu, baina baita birziklatutako materialak erabiltzea eta Debako tradizioekin lotura duten apaintze-ideiak jartzea ere.

Guztira lau sari banatuko dira: 200 eurokoa lehena, 150 eurokoa bigarrena, 100 eurokoa hirugarrena eta 50 eurokoa laugarrena. Saridunak urtarrilaren 5ean jakinaraziko dira, Errege Magoek sariak emateko ekitaldian.

Informazio gehiagorako, idatzi turismoa@deba.eus helbidera edo bisitatu www.deba.eus webgunea.