CIMASUB, Nazioarteko Itsaspeko Zinema Zikloa, izango da martxoaren 16, 23 eta 30ean

2023ko otsailaren 27a

Martxoaren 16, 23 eta 30ean CIMASUBen, Nazioarteko Itsaspeko Zinema Zikloaren,  24. edizioa ospatuko da Debako Kultur Elkartean, 18:30ean, “Orain edo inoiz ez” lelopean. Mundu osoko zaletu eta ikus-entzunezko profesionalen grina, gizakiaren eragina erdigunean jarrita, planetaren bizi iraupenerako hain  garrantzitsuak diren itsaso eta ozeanoen edertasuna eta narriadura erakutsiko dira.

Real Sociedad Itsaspekoak elkarteak antolatuko du eta Udalak babestu. Ikus-entzunezko lan ezberdinen hedapenean oinarrituta, Itsaspeko mundua ezagutaraztea eta itsaso eta ozeano guztien zainketaren kontzientzia zabaltzea helburu du. CIMASUB Nazioarteko itsaspeko zikloa itsasoko enbaxadoreak diren ikus-entzunezko profesional ezberdinen eta zinema aretoetara gerturatzen diren milaka bisitarien komunikazio kanala bilakatu da.

26 laburmetraia eta 4 dokumental ikusteko aukera izango da. Horietan, planetaren itsaspeko paradisu ezberdinekin gozatzeko parada izatearekin batera, gure itsasoek sufritzen duten narriadura azaleratuko dute. 

Alde batetik, hurrengo belaunaldien etorkizuna mehatxatzen duten gizakiaren ekintza eta jarrera desegokiak salatzeko ispilua izango dira, ekosistema osoen hondamendia, biodibertsitatearen suntsipena eta arrantza baliabideen ustiapen jasangaitza bideratzen dituztenak. Bestalde, ikuspuntu baikor baten begiradatik, gure planetan ezkutuan dauden altxorren unibertsoa ezagutzeko aukera izango da, bizitza basatiaren garapena bideratzeko osasuntsu mantentzen direnak eta begiztatze soilarekin  liluratu eta maitemintzen gaituztenak.

47 urteko lanaren ondoren, planeta osoko itsaspeko zinemaldirik luzeena bihurtu da CIMASUB. Munduko erreferentea da urpeko zinemaren jaialdietan, eta mundu osoko film laburrak eta dokumentalak jasotzen ditu lehiaketara. 80 herrialde baino gehiago azken edizioan. Hori dela eta, aukera paregabea da pantaila handian sektoreko lanik onenekin gozatzeko, bai kalitateari dagokionez, bai sentsibilizazioko eta itsasoko ingurumen-hezkuntzako edukiei dagokienez ere,

 Itsaspeko Txikizikloa

Haur eta gazteak errespetuzko eta maitasunezko begirada batetan hez daitezen jaio zen Txikizikloa orain dela hamar urte. Hezkuntza eta hedapena dira gure itsasoak bizirik mantendu eta gizakiaren etorkizuna bermatzeko tresnarik indartsuenak.

Kultur Elkartean egingo dira Txikizikloak, goizeko 10:00etan, martxoaren 16an, eta bertan Lehen Hezkuntzako 5. eta 6. mailako haurrek parte hartuko dute.

Parte hartzen duten ikastetxeei aurretik gelan lantzeko material didaktikoa erraztu zaie ikus-entzunezko material osagarriarekin eta jarduera eta orientazio metodologikoekin batera.

Ekintza honen bitartez, helburu ezberdinak lortu nahi dira: ingurumenaren egoeraz jabetzea eta kontsumo osasuntsu eta arduratsuaren eta ingurune hurbilaren errespetuaren eta zaintzaren jarrerak garatzea, haren kudeaketan arduraz parte hartzeko; eta gizakiaren eguneroko bizitzan planetaren ongizatean eragina duten erabakiak hartzeko, ezagutza zientifikoan oinarritutako erabaki pertsonal eta kolektiboak lantzea.