Debabarreneko Euskararen Ginkanan izena emateko epea zabalik

2019ko urriaren 7aDebabarreneko Euskararen Ginkanan  izena emateko epea zabalik

Debabarreneko Euskararen Ginkanaren lehen edizioa egingo da. Kutxa Ekogunearen Euskararen Ginkana, euskararekin eta euskaraz dibertitzeko lehiaketa da eta euskararen bueltan gozatzeko taldekako eta herrien arteko lehiaketa. Euskararekin, hizkuntza aniztasunarekin eta hizkuntza-ekologiarekin lotutako hainbat proba burutu behar izango dituzte talde lehiakideek. Aurtengo edizioan Hizkuntza-Ekologia izango da gaia.

Eibar, Elgoibar, Soraluze, Deba eta Mutrikuko DBH4ko gela bakoitzeko ikasle talde batek (4-8 ikasle) parte hartu ahal izango du gelako ordezkari gisa, Debabarreneko Euskararen Ginkanaren lehen edizio honetan. 

Ekimena, hainbat erakunderen elkarlanaren fruitua da: Kutxa Ekogunea, Debabarreneko udalak (alegia, Eibar, Elgoibar, Soraluze, Mutriku eta Debako udalak) eta Euskaltzaleen Topagunea.

Hizkuntza-ekologiarekin lotutako hainbat proba burutu behar izango dituzte talde lehiakideek. Debabarreneko Euskararen Ginkanaren I. edizio honetan mundu mailako begiradatik, eskualdeko begirada eta praktiketara egingo da salto.

Lehiaketak bi fase izango ditu. Lehen fasean internet bidezko frogak egingo dira. Lau aste iraungo ditu fase honek, 2019ko urriaren 23an hasiko da eta azaroaren 20an amaituko da. Webgunean, astero taldeek burutu beharreko proba bat argitaratuko da eta aste bete izango dute taldeek erantzunak bidaltzeko. Proba hauetan puntu gehien lortzen dituzten lau taldeek jokatuko dute bigarren fasea.

Bigarren fasea, finala izango da eta abenduaren 4an jokatuko da Eibarren. Bertan erabakiko da nor den Debabarreneko Euskararen Ginkanaren talde irabazlea.

Izen-emate epea 2019ko irailaren 23an hasi eta urriaren 22an amaituko da, biak barne.

Izena online eman behar dute talde parte hartzaileek euskararenginkana.eus webgunean. Ondorengo orrian daude argibideak, oinarriak eta izena emateko esteka: 

http://www.euskararenginkana.eus/eu/ginkanak/debabarreneko-euskararen-ginkana-1edizioa-2019/gi-41/

Sariaren banaketa ondorengoa izango da: 800 euro irabazleari. 200 euro bigarren geratzen denari. Kultur jardueretarako sarrerak edota erosketa-bonoak 3. eta 4.geratzen direnei (talde bakoitzak 100 euroko bonua jasoko du Eibar Merkataritza Gune Irekiaren bitartez).