Debako gaztelekua 'Zuk Zeuk' lehiaketaren finalerako sailkatu da

2021/03/26
Garapen jasangarriarekin lotutako 'ginkana erraldoi' moduko bat da 'Zuk Zeuk'. Euskal Herriko 900 gaztek hartu dute parte. Debako 2006an jaiotako 35 gaztek hartu dute parte ekimenean herriko Gaztelekuaren bitartez. Feel My Way kooperatibak antolatu eta Gipuzkoako Foru Aldundiak lagundu du ekimena.

Ginkanan, arlo pribatuko zein publikoko elkarte babesleek jarritako erronkei egin diete aurre. 300 gaztek lortu dute aste honetan jokatuko den finalera pasatzea, eta horien artean daude debarrak. 30.000 euro banatuko dituzte saritan.

300 gazteak 20 taldetan banatuta egongo dira, eta plataforman zehar erronkaz erronka ibiliko dira puntuak biltzen. Talde hauek, 700 eurotik hasi eta 1.000 euro arteko sariak izango dituzte. 

Hainbat gai landu dituzte 'Zuk Zeuk' lehiaketa osoan zehar, bakoitza babesle den eragile hauetako batek proposatuta eta garapen iraunkorreko helburuekin lotuta. Hona hemen adibide batzuk: Elkartasuna, Laboral Kutxarekin; goserik eza, Hazirekin; ekoizpen eta kontsumo arduratsua, Ausolan Fundazioarekin; mugikortasun iraunkorra, Mugirekin; bizitzarako gaitasunak, Edex Fundazioarekin eta etorkizuna sortzen, Mondragon Team Academy, Deustuko Unibertsitatea, Euskal Herriko Unibertsitatea, IMH eta IED Kunsthal Bilbaorekin.

Finala, berez, Donostian presentzialki egitekoa zen, baina osasun egoera ikusita bide telematikoen bidez jokatuko dute.