Debako Luzaro eskolako ikasleak hondartzako hondakinak jasotzen aritu dira

2022ko ekainaren 2aDebako Luzaro eskolako ikasleak hondartzako hondakinak jasotzen aritu dira

Astelehenean, maiatzak 30, Debako Luzaro eskolako HH3, HH4 eta HH5eko ikasleak 'Ur (h)ondoa garden' ekimenaren barruan hondartzako hondakinak jasotzen aritu ziren. Mailaka sailkatuta, Udalak banatutako zorroetan jaso zituzten asteburuan jendeak hondartzan utzitako hondakinak.

Asteburuan eguraldi ona egin arren, zorionez, ez zeuden hondakin asko jasotzeko. Haitzetan trabatutako gurpil bat, eta hondartzako erabiltzaileek utzitako maskarak eta ontziak (plastikozko botilak, aluminiozko latak eta bilgarriak) izan ziren jasotako gehienak. Guztira 23 kilo inguru errefusa eta 7,2 k. ontzi jaso zituzten. 

Umeek jasotako ontziak pasealekuan jarritako Euskal balean sartu zituzten. Horixe baita balearen eginkizuna, erabiltzaileek hondartzan utzitako ontziak bertan biltzea, jendea konturatu dadin garbiketa zerbitzurik ez dagoenean horietako askok itsasoan amaitzen dutela. 

Horrekin batera, lehen hezkuntzako gela bakoitzeko Eskolako Agenda 30eko arduradunak hondartzara bertaratu, eta kanpainaren leloa 'Ur (h)ondoa garden' eta Agenda 2030en Garapen jasangarriko 17 helburuen irudia marraztu zuten hondarrean.