Debako Udalak balkoiak eta leihoak apaintzeko II. lehiaketako sariak banatu ditu

2019/08/02
Herri mailako sariez gainera, eskualde mailako sari bat ere egon da.

Debako Udaleko Obrak, Zerbitzuak eta Ingurumen batzordeko lehendakaria den Antxoka Elorzak gaur banatu ditu balkoiak eta leihoak apaintzeko II. lehiaketako sariak, eskualdeko gainontzeko udalek aurreko asteetan banatu zituzten. Elgoibar, Eibar, Ermua, Mutriku eta Debako udalek antolatu dute egitasmoa, Debegesa Garapen Agentziaren lankidetzarekin.

Epaimahaiak uztailean zehar ikusi eta baloratu ditu balkoi eta leiho parte-hartzaileak lore apainketa ederrenak saritzeko. Deban, guztira, 16 parte-hartzaile izan dira. Epaimahaiaren balorazio irizpideak honako hauek izan dira: kanpoko ikuspena, konposizioaren originaltasuna eta sormena, apainketaren kalitatea, apainketaren harmonia eta diseinua, eta konplexutasuna.

Lehiaketa maiatzean abiatu zen, eta deialdiarekin batera, lore banaketak egin zituzten bost udalek, herritarrei loreak oparitzeko. Deban, guztira, 175 lore banatu ziren. 

Sariei dagokienez, lehenengoa Itziar Urainek irabazi du; Debalai herriko merkatari elkarteko saltokietan erabiltzeko 200 euro. Iaz ere bera izan zen garaile. Bigarrena, 150 €-koa, Lourdes Arriolak irabazi du. Eskualdeko saria,  aldiz, 250 €-koa, Mutrikura joan da aurten.

Lehiaketaren helburua izan da, herritarren parte-hartzearen bidez, bost herrien ingurumen kalitatea eta irudia hobetzea, eta landareei eta loreei garrantzia emanez, herrigune atseginagoa eta ederragoa lortzea; eta bide batez, herritarren artean, landareak zaintzeko ohitura zabaltzea.

Lehiaketan izena eman ez duten balkoi dotoreak ere ikusi ditu epaimahaiak, beraz, mila esker denoi herriko irudia hobetzen laguntzeagatik.