Debako Udalak bizikletak aparkatzeko eta konpontzeko gune berriak jarriko ditu

2025ko maiatzaren 28aDebako Udalak bizikletak aparkatzeko eta konpontzeko gune berriak jarriko ditu

Guztira 70 aparkaleku berri jarriko ditu, udalerriko bost gune estrategikotan banatuta, autokonponketarako bi gunerekin eta egungo aparkalekuen berrikuntzarekin batera. Proiektuak, Gipuzkoako Foru Aldundiko Iraunkortasun Departamentuak finantzatua, Deban mugikortasun iraunkorra eta bizikletaren erabilera sustatzea du helburu, ingurumena errespetatzen duen bizi-eredu osasungarria sustatuz.

Ingurumenarekiko errespetua oinarri hartuta eta bizi-ohitura osasuntsuak bultzatze aldera, Debako Udalak bizikletentzako bost aparkaleku berri eta autokonponketarako bi gune jarriko ditu, garraiobide horren erabilera errazteko eta udalerrian mugikortasun iraunkorra sustatzeko.

Esku-hartze hau Gipuzkoako Foru Aldundiko Jasangarritasun Departamentutik lortutako 6.881,88 euroko dirulaguntza bidez eramango da aurrera, bizikletentzako azpiegiturak garatzeko 2025 deialdiaren esparruan.

Bost aparkalekuak Debako gune nagusietan banatuko dira, hala nola futbol zelaian, hondartzan, liburutegian, gaztetxean eta musika eskolan. Guztira, 70 bizikletentzako lekua izango dute gune horiek: 20 plaza futbol-zelaian, 20 hondartzan eta 10 plaza aipatutako beste hiru puntuetako bakoitzean.

Gainera, autokonponketarako eta gurpilak puzteko bi puntu publiko ere jarriko dira Itziarko Gainan eta Zumardian, udalerritik igarotzen diren erabiltzaile eta txirrindulariei zerbitzua emateko. Bizikletak aparkatzeko Deban gaur egun dauden puntuak ere berrituko dira.

Ekimen honekin, Debako Udalak eguneroko joan-etorriak bizikletaz egin daitezen bultzatu nahi du, ahal den neurrian autoaren erabilera murriztuz, eta bizikletaren erabileraren bidez turismo eta aisialdi iraunkorra sustatuz. 

Aparkaleku seguru eta erosoak eta autokonponketarako guneak jartzea funtsezko urratsa da herrian bizikleta bidezko mugikortasuna normalizatzeko eta errazteko.