Debako udalbatzak ez-ohiko osoko bilkurako gai guztiak aho batez onartu ditu

Besteak beste, diru-biltzailearen lanpostua sortzea erabaki da. Honela, lehen aldiz udalekotu egingo da aipatu lanpostua. Proposamena sindikatuekin negoziatu du Debako udalak Negoziazio Mahai Orokorrak maiatzaren 28an, ekainaren 15ean eta uztailaren 8an egindako bileretan. Ondorioz, indarrean dagoen lanpostuen zerrenda moldatu da eta diru-biltzailearena gehitu zaio eta lanpostuak izan behar dituen ezaugarriak adostu dira. Jarraitu behar diren tramiteak bete ondoren, hortaz, egingo da posturako deialdi publikoa. 

Debako II berdintasun plana ere onartu du udalbatzak, 2020-2023 urteetarako. Daiteke aholkularitzako teknikariek gidatuta eta Emakunderen babesarekin egin da plana. Bigarren plan honen lanketa egiteko, lehen planaren balorazioa hartu da aintzat, batetik, eta eragile eta herritarren ekarpenak, bestetik. Galdetegia egin zen aurreko urte amaieran, lehen planaren inguruko herritarren iritzia jasotzeko. Honekin batera, hainbat bilera egin ziren udal langile, arduradun politikoekin eta herriko eragileekin. 

Itziar Irizar Beristain Berdintasuna eta Politika feministen zinegotziaren esanetan, “plan honetan nabarmenduko nuke aurrekoarekin alderatuta errealistagoa dela. Aurrekoaren balorazioa egin zenean, ez zela errealista ondorioztatu zen. Oraingoan, asko zaindu dugu neurri zehatzak jaso zitezen eta ez zedin izan asmoen adierazpen soila. Nahi duguna da, 2023a amaituta, Debako gizon eta emakumeen arteko berdintasunean urrats eraginkorrak eman direla ikustea eta ondorioz, bigarren plan hau eraginkorra eta egingarria izatea”.

Debako Musika eta Dantza Eskolako barne araudi berria ere onartu zen bilkuran. 2013 urtean egindakoa da orain arte indarrean egon dena eta araudi berria gaur egungo egoerara eguneratu da.