Dinamikoa izango da Debako Santiago hondartza

2020/06/19
Uztailaren 1ean hasiko da Deban hondartza denboraldia, Gipuzkoako gainontzeko hondartzetan bezala. Zaintza-ordutegia 11etatik 19etara izango da. Hori prestatzen aritu da Debako udala, Gipuzkoako Foru Aldundiaren hondartzen mahaian eta baita Deban bertan eragileekin osatutako mahaian ere. “Hondartza dinamikoaren kontzeptua lantzen aritu gara eta Debako Santiago hondartza horrelakoa izatea nahi dugu”, Antxoka Elorza ingurumen zinegotziaren arabera.

 

Koronabirusak eragindako egoera dela eta, hondartzetan ere segurtasun, osasun eta garbitasun neurriak hartu beharko dira. Irizpide guztiak argi egon daitezen, hondartzako sarreretan informazio panelak jarriko dira, bai Gipuzkoako Foru Aldundiarenak eta baita Debako udalak propio egindakoak ere. 

Debako udalak, dei egin nahi die herritar guztiei irizpide eta jarraibide horiek bete ditzaten. Ildo horretan,“udaz gozatzeko gonbidapena egin nahi dizuet, baina, aldi berean gogorarazi nahi dizuet ez dezazuen ahaztu gure artean dagoela covid-19a. Horregatik, jarraitu uneoro osasun agintariek eta kasu honetan Debako udalak ematen dizkizuen irizpideak”, gogorarazi nahi du Gilen Garcia, debako alkateak. Udalaren esku dauden bitarteko guztiak jarriko direla esan du, halaber, alkateak.

Hondartzaren edukiera mugatu egingo da segurtasun, osasun tarteak errespetatzeko. Elkarrekin bizi ez diren pertsonen arteko bi metroko tartea mantendu beharko da. Gehienez ere 3 orduko egonaldiak egitea eskatzen da, guztiok izan dezagun hondartzan egoteko aukera. 

Aldundiak eta AZTIk garatutako app-aren bitartez zainduko da hondartzaren edukiera. Ordu erdiro eguneratuko da eta hor ikusi ahalko da nola dagoen edukiera. Baita sorosleen zaintza-dorrean egongo diren hiruki formako banderen bitartez eta megafoniatik emango diren oharrekin. 

Idoia Alvarez Debako udaleko ingurumen teknikaria da. Hark azaldu ditu hondartzetan aurten bete beharko diren irizpideak. Edukiera ahalik eta ondoen baliatzeko, aurten ezingo dira eguzkitakoak eta toldoak jarri. 11Etatik 19etara ezingo da taldeko kirolik egin. Itsasgoran, ezingo da hondarrean kirolik egin. 

Dutxak ordezkatu egingo dira segurtasun distantziak manten daitezen. Erdiko pasarela jarriko da bainurako laguntza behar duten pertsonentzat. Aldagelak itxita egingo dira eta aldagelen espazio horretan eta dorreetan emango dute zerbitzua sorosleek. Hondartza barruan egon ohi diren zaborrontziak pasealekuan jarri dira eta egunero desinfektatuko dira. Nafarroa plazako aparkalekuko komunak zabalik egongo dira, eta hauek ere ohi baino maiztasun handiagoarekin garbitu eta desinfektatuko dira.