Erosi Deban merkataritza bonuen balorazio ona egin dute Udalak eta Debalaik

2021ko urtarrilaren 15aErosi Deban merkataritza bonuen balorazio ona egin dute Udalak eta Debalaik

Abenduaren 22an jarri ziren herritarren esku udalerriko merkataritza eta zerbitzu entitateak laguntzeko Erosi Deban bonuak. 12.000 euro bideratu ditu Debako Udalak kanpainara. Oraindik establezimenduren batean bakarren bat gelditzen bada ere, gehienak erabili dituzte jada herritarrek. Kanpainaren balorazio ona egin dute merkatariek eta Udalak.

Denera 25 merkataritza eta zerbitzu establezimenduk hartu dute parte kanpainan. Establezimendu mota desberdin askok egin dute eskaintza: arropa dendak, zapata dendak, bizikleta dendak, artisau bat, loradendak... Oraingoan zerbitzuetakoak ere sartu dira kanpainan: 6 ile-apaindegi, estetika zentro bat eta fisioterapiako bi zentro egon dira. 

Establezimendu bakoitzari 49 bono egokitu zitzaizkion. Bonoak 30 eurokoak izan dira eta horietatik 10 euro jarri ditu Debako Udalak. 

Bereziki arropa dendetan bukatu dira azkar. Kontuan hartu behar da Gabon garaian egin dela kanpaina eta zain zeudela erosleak. Bonoak ateratzea kosta egingo zitzaiela aurreikusi zutenek ere ia bukatzear dituzte une honetan. 

Egindako balorazioan eskertuta agertu dira parte hartzaileak. Bezeroei oparitxoa egin zaiela uste dute eta hurrengoa noiz egingo zain daude.