Erronka berriei erantzuteko aurrekontu proposamena lantzen ari da Debako udal gobernua

2020/12/04
2021eko aurrekontuak lantzen ari da Debako udal gobernua. Horretarako iaz landutako Gobernu Plana da oinarri, bertan zehaztutako 5 ardatzak (Udal Antolaketa, Gizarte Politikak, Tokiko Garapena, Kultura eta Herri Ondarea, eta Berdintasuna eta Parte-Hartzea), hain zuzen. Egoerak eskatzen dituen beharrei erantzuteko asmoz, dinamikoak izango dira aurrekontuak.

"COVID-19ak eragin duen krisi sozial, sanitario eta ekonomikoa ere testuinguruan kokatzea dagokigu, beharrizan berriak sortu eta erronka berrien aurrean jarri baikaitu. Egungo egoerak berak, aurrekontuei ezaugarri propioa ere eman die. Egoera aldakor bati erantzuteko aurrekontuak, hauek dinamikoak izatea eskatuko du ezinbestean, izan ere, behar beharriak sortu ahala erantzunak ematen joan beharko gara eta ezin dugu aurrekontu estanko batekin lan egin", Itziar Irizar Ogasun zinegotziaren ustez. 

Horrez gain, 2020ko aurrekontuetan murrizte handia egin behar izan genuen, Gipuzkoako Foru Aldundiak jakinarazitako %20ko murrizketengatik. Eta 2021rako ere murrizketa espero da, txikiagoa izango bada ere. Azken hilabeteotan bezala beraz, datozen hilabeteetan egin beharreko lanak garrantzia handia izango du, eta aurrekontuek paper garrantzitsua jokatuko dute lan hori burutzerakoan", Irizarren esanetan.

Gauzak horrela, 2021eko aurrekontuak lantzen hasterakoan kontuan hartutako irizpide nagusienetarikoak honakoak izan dira: Gizarte Zerbitzuak indartzea (familia zaurgarriak, haurrak, pertsona nagusiak...), Berdintasuneko partidetan murrizketarik ez egitea (pandemia garaian eta bereziki konfinamenduan emakumeekiko indarkeriaren prebentzioan lana indartu beharra ikusi da), herriko beharrizanetan lehentasunak markatzea, koronabirusak kaltetutako merkataritza eta ostalaritza sektorea kontuan izan eta neurriak zehaztea (zergak murriztea, adibidez). 

Lanketa honekin hasteko udalerriko lehen azterketa bat egin da, eta barne-lanketa horren ondoren abenduan eta urtarrilean zehar lan-bilerak egingo ditu udal Gobernuak Udalbatzako gainontzeko alderdiekin eta Batzordeak alderdi eta herriko eragileekin, identifikatutako beharrak partekatu eta aurrekontuen lanketarekin aurrera jarraitzeko.

Asmoa 2021eko aurrekontuak urtarrileko osoko bilkuran onartzea da.

Argazkia: Ander Salegi