ETSk Arronamendiko tunel zaharrak itxiko ditu urtarrilean

2018/12/26
Lur mugimenduak egon dira, eta tunelen egonkortasuna arrisku larrian dago.

Euskal Trenbide Sareak (ETS) idatziz jakinarazi dio Udalari Arronamendiko hegalean izan diren lur mugimenduek trenbidearen azpiegitura izandakoaren egonkortasuna arrisku larrian dagoela. Eragin larrienek Arronamendiko tunelei, arkuen hormari eta Mogoteko tunelaren eta Aitxuliko tunelaren arteko zuzenbideari dagozkie.

Egoera ikusita, Euskal Trenbide Sareak oinezkoei zuzendutako "igarotzea debekatuta" adierazten duten seinaleak jarri zituen. Hala ere, oinezkoak seinaleei kasurik egin gabe bertatik igarotzen dira.

Bai GR-121a, bai eta ibilbide geologikoak ere zonalde horretan daude, eta ezinbestekoa da beraien segurtasunerako arriskutsuak izan daitezkeen guneetara oinezkoak igarotzea saihesteko neurriak hartzea. Hori dela eta, 2019ko urtarrilaren bigarren hamabostaldian aipatutako tunelak itxi eta ibilbidean zehar oharrak jarriko dituzte.