Euskal Jaia 2014

1964. urtean ospatu ziren lehen aldiz Debako Euskal Jaiak, gerra ondorengo lehenak. Maiatzeko hirugarren igandean egiten ziren eta Euskal Herriko zazpi probintzietatik hurbiltzen zen jendea Deban zegoen euskal giro apartaz gozatzera.

Ezin daiteke ordea Debako Euskal Jaia OARGUI gabe ulertu, talde hau izan baitzen jaiak antolatu eta bultzatu zituena.

Debako OARGUI (Organización Artística Recreativa de Guipúzcoa) talde kulturala zen, eta honek urte osoan zehar lan egiten zuen Euskal Jaiak prestatzeko. Herriz herri ibiltzen ziren antolatzaileak tokian tokiko euskaltzaleekin hitz egiten, Debara gonbidatuz, eta dantza zein musika taldeekin kontaktuak eginez.

Antolakuntzatik Euskal Herri osorako deialdia egiten zen, eta Euskal Herri osoaren erantzuna gure herriko kaleetan ikusi zitekeen.

1964ko maiatzaren 17ko goiz hartan, Deba Euskal Herri osotik etorritako jendez beteta agertu zen. Antolatzaileek ez zuten inondik inora espero horrelako erantzunik: kaleak lepo zeuden, euskara lasaitasunez entzun zitekeen, eta herritarren erantzuna ere imajina ezina zen. Garai hartako aldizkariek ere egun horren berri eman zuten.

64ko Euskal Jaia oso arrakastatsua izan bazen, Debako OARGUIk antolatutako bigarren Euskal Jaia izugarria izan zen. Herriko kaleak jendez bete ziren, aurreko urteko Euskal Jaiak oihartzun handia izan baitzuen.

1965eko maiatzaren 16an ospatuko ziren Euskal Jaiak,  eta 1966an egiteko prestatu zirenak ere, azken momentuan Gipuzkoako Gobernadore Zibilak debekatu egin zituen.

Diktaduraren ondorengo hasierako urteetan, 76an eta 77an, orduko Gazteen Elkarteak antolatutako Euskal Jaiak ere arrakastaz ospatu ziren, baina gure herrian 1998an  berreskuratu ziren Euskal Jaiak modu iraunkor batean; azken aldi horren hasieratik, ordea, iraileko azken asteburua izango da euskaltzaleak bilduko dituen asteburua.

 50. urtemuga hau gogora ekarri eta ospatzeko, egitarau berezia antolatu du Debako Udalak irailean zehar.

Orain dela 50 urte, Euskal Jaiaren bidez Euskal Herriko kulturari ekarpena egin zioten debarrei errekonozimendu bat egin, eta belaunaldi berriei gure herriko historia eta istorioak helarazi nahi dizkiogu, herriko memoriaren parte baitira.

Horrela, Udalak Debako Euskal Jaiaren historia kontatzen duen liburuxka bat argitaratu du eskolako umeei banatzeko, era politean eta errazean historiaren berri eduki dezaten. Herritarrentzat ere ale kopuru bat argitaratuko du udalak, herriko liburudendetan, turismo bulegoan, zein liburutegian eskuratu ahal izango direnak.

Egitarua hilaren 23an Agirre Jauregian hasiko da, 1964ko argazki bat zintzilikatu eta Euskal Jaietako kartelen erakusketarekin. Erakusketa hilaren 28ra arte luzatuko da.

Irailaren 24an, asteazkena, Euskal Literatura izango dugu, Tene Mujika beka, eta Josu Martinezek “ Tunelak, izarak, mozorroak eta bafleak” liburua aurkeztuko du, 19:00etan Agirre Jauregiko Ispiluen Gelan.

Hurrengo egunean, ostegunean arratsaldeko 19.00etan, Euskal Jaietako hamarkada ezberdinetako protagonista batzuk mahai baten bueltan jarriko ditugu Agirre Jauregiko Ispiluen Gelan, beraien bizipen eta esperientziatik jai honen berri eman eta orduko zein gaurko istorioak kontatzeko.

Ostiralean berriz, hilaren 26an, iturri ondoan Euskal  musikarekin gozatzeko aukera izango dugu 22.00etatik aurrera, Jokin Lasaren “zortziko txiki bat” –ekin.

Eta larunbata, Irailaren 27a, izango da egitarau guztia borobilduko duen eguna, Euskal Jai eguna.Goizeko 10.00etatik aurrera, dantzariz beteko da gure herria, Euskal Herriko txoko ezberdinetako dantzariez, 1964ko alardea berriro gogora ekarriz, eta orduan bezala, zumardiko kioskoan, dantza talde guztiei ongi etorria emango die debako herriak, eguerdiko 13.00etan.

Ondoren, frontoian marmitako plater goxoena norena den jakiteko aukera izango dugu, urtero bezala egiten den lehiaketan, eta 15.00etan herriko euskaltzalez beteko dugu frontoai egingo den herri bazkarian.

Ez da hala ere hemen bukatuko eguna. Arratsaldeko 18.30ean Zesuma taldearekin erromeria aspertu arte izango dugu.

Debako Udalak egitaraua herritar guztien gustokoa izatea espero du eta 50.urtemuga hau ospatzera eta parte hartzera gonbidatzen ditu guztiak.