Euskararen Nazioarteko Egunari begira adierazpen instituzionala onartu du Debako udaleko osoko bilkurak

2019ko azaroaren 29aEuskararen Nazioarteko Egunari begira adierazpen instituzionala onartu du Debako udaleko osoko bilkurak

Aho batez onartu du udalbatzak Euskararen Eguneko adierazpena, hilaren 28an egin den osoko bilkuran. Abuztuaren 17a tokian tokiko jai eguna izatea ere adostu dute, San Roke eguna igandea izango baita 2020an. Emakumeekiko indarkeriaren aurkako adierazpena eta Bolivian ematen ari den estatu kolpea salatzeko adierazpena ere onartu dira.

Abenduaren 3an ospatuko da Euskararen Nazioarteko Eguna. Hainbat erakunderen artean landutako adierazpena onartu du Debako udalak ere. Bertan, urte hauetan guztietan euskarak egindako bidea txalotzen da. “Eta asko lortu da. Jardunak berak erakutsi digu, erakusten digu egunero, ezinbestekoa dela bide horiek, gauzak egiteko moduak, etengabe eguneratzea, eraberritzea, irudimenez biziagotzea. Eta argi erakusten ari gara euskalgintzan ari garen guztiok prest gaudela, eta gogotsu, irakaspena barneratzeko eta praktikan mamitzeko”.

Iaz lehen aldiz egin zen ekimen handiari, Euskaraldiari ere erreferentzia egiten dio. “Ezagutzen ez genuen modu batean aktibatu zituen iazko gizarte-ariketa arrakastatsuak euskal hiztunak, neurri batekoak nahiz bestekoak. Aktibatu zituen, baita ere, herri aginteak eta askotariko gizarte-erakundeak, ikuspegi berri batetik. Eta, batez ere, estrategiak eta diskurtsoak eraberritzeko joera eta prestasuna aktibatu zituen. Aldekotasuna, horrela, konpromiso eragingarri eta praktiko bihurtzeko bidean jarri zen”.

Arlo sozioekonomikoak eta euskararen erabilerak elkarri egin behar dioten ekarriaren garrantzia ere nabarmentzen da agirian. ez da gutariko inorentzat ezezaguna. “Bai baitakigu ez dela hizkuntza normalkuntzarik lanaren, ekonomiaren eta kontsumoaren munduan erro sakonik ez duenik”.

Azaroaren 25ari lotutako adierazpena aho batez onartu zen. Honela dio: “Azaroaren 25a 'Emakumeen kontrako indarkeria ezabatzeko nazioarteko eguna' dela-eta, Debako Udalak, bere egiten du gure lurralde, herrialde eta herriak, indarkeria matxistarik gabeko gune gisa eraikitzeko ardura. Eta lehentasunezko konpromiso politikoa berresten du indarkeria mota horren adierazpen guztien kontrako borrokan, egiturazko jatorriaren eta betikotzen duen normalizazioan eraginez, orden sozial patriarkala ezinbestez aldatzeko eta, emakumeak libre biziko diren justizian eta berdintasunean oinarritutako elkarbizitza eta emakumeen eta gizonen arteko harreman ereduak errealitate bihurtzeko xedez”.

Bolivian ematen ari den estatu kolpea salatzeko egindakoa berriz, aldeko 11 botoekin eta 2 abstentzioekin onartu zen. Gogor salatzen da gertatzen ari den egoera, eta besteak beste, “Bere babesa adierazi nahi die Evo Morales presidenteari eta El Alton eta Bolivia osoan kolpearen kontra mobilizatzen hasi diren herritarrei. Herritarrei dei egiten die Estatu kolpe honi aurre egiteko antolatzen diren mobilizazioetan parte hartzera”.