Itziarrek azaroan hartuko ditu “Dolu” eta “Death-Kafea” topaketak, doluari eta heriotzari buruz modu kolektibo eta emozionalean hausnartzeko

2025ko azaroaren 6a

“Dolu” ikuskizun poetiko-musikala azaroaren 7an izango da, ostirala, 19:00etan Burugorri Gainean (Itziarren), eta bertan musikari batek, bertsolari batek eta poeta batek parte hartuko dute. Jarduera honek dolua adierazteko espazio artistiko eta sentikorra eskainiko du. “Death-Kafea” izeneko topaketa azaroaren 13an egingo da, osteguna, 17:30etik 19:30era Kalebarreneko lokalean. Heriotzari buruz taburik gabe hitz egiteko gune irekia izango da. Sarrera doakoa da, baina aldez aurretik izena ematea gomendatzen da 943 199 255 telefonora deituta edo apuntatu@itziar.eus helbidera idatzita.

Azaroan zehar, Itziarko Auzo Udalak heriotzaren eta doluaren inguruko bi ekitaldi berezi antolatuko ditu. Heriotza eta dolua bizitzaren parte garrantzitsuak dira, baina gure gizartean sarritan ez dira modu irekian lantzen. Horregatik, bi proposamen osagarri aurkeztu dira: batetik, “Dolu” izeneko jarduera artistikoa, eta bestetik, “Death-Kafea” izeneko elkarrizketa irekia. Biak dira aukera bat hausnarketarako, sentimenduak partekatzeko eta gai hauek elkarrekin jorratzeko.

“Dolu”: musika, bertsoa eta poesia dolua adierazteko

Lehen ekitaldia “Dolu” izango da, doluari eta galerari buruzko emanaldi artistikoa. Hiru sortzailek parte hartuko dute: Pello Ramirez musikariak, Aitor Mendiluze bertsolariak eta Andoni Salamero poetak. Poesia, musika eta bertsolaritza uztartuta, doluak eragiten dituen emozio desberdinak modu estetiko eta sentituz landuko dituzte. Emanaldia azaroaren 7an izango da, ostirala, 19:00etan, Burugorri Gainean (Itziarren). Helburua doluari buruz hitz egiteko eta sentitzeko espazio hurbil eta lasai bat sortzea da, artea adierazpenerako tresna erabiliz.

“Death-Kafea”: heriotzari buruz lasai eta irekitasunez hitz egiteko gunea

Bigarren ekitaldia “Death-Kafea” izango da, heriotzaren inguruan hitz egiteko elkargune irekia. Kafe giroan, pertsonei aukera emango zaie heriotzaz, doluaz eta bizipen pertsonalez modu lasaian eta taburik gabe hitz egiteko. Ez da terapia saio bat, baizik eta partekatzeko eta entzuteko espazio segurua. Ekitaldia azaroaren 13an izango da, osteguna, 17:30etik 19:30era, Itziarko Kalebarreneko lokalean. Bi gidari izango ditu: Saioa Puebla Agirre, Sen Bizia terapia zentroko terapeuta, eta Andoni Salamero Alberdi, biografia-prozesuen gidaria. Sarrera doakoa da, baina aurrez izena ematea gomendatzen da 943 199 255 telefonora deituta edo apuntatu@itziar.eus helbidera idatzita.

Bi ekimen hauek doluari aurre egiteko modu kolektiboak berreskuratzeko nahitik sortzen dira, euskal tradizioetan eta gaur egungo laguntza emozionalaren bide berrietan oinarrituta. Helburua isiltasunaren eta bakardadearen ordez hitza, elkartasuna eta entzutea erdigunean jartzea da, eta dolua modu osasuntsuago batean bizitzeko espazioak eskaintzea.