“KARST, Geoparkearen altxor ezkutuak”

2013/11/15
Euskal Kostaldeko Geoparkeak “Karst” ikus-entzunezkoaren aurkezpena eta hitzaldi dibulgatiboa eskainiko du hurrengo ostiralean, hilak 22, Debako Kultur Elkartean, 19:30ean. “KARST, Geoparkearen altxor ezkutuak” izenburupean, Arantza Aranburu EHUko Irakasleak, Geoparkeko haitzuloetan egiten ari diren ikerketen gaineko hitzaldi dibulgatiboa eskainiko du; horren aurretik, Alberto Gorritibereak zuzendutako “Karst” izeneko ikus-entzunezkoa aurkeztuko da, zine zuzendaria bera bertan egongo delarik.

Euskal Kostaldeko Geoparkeak hitzaldia eta ikus-entzunezko emanaldia eskainiko du hurrengo ostiralean, hilak 22, “KARST, Geoparkearen altxor ezkutuak” izenburupean. 19:30ean hasiko da ekitaldia, Kultur Elkartean.

Alberto Gorritiberea zine zuzendariak egindako “Karst” ikus-entzunezkoaren aurkezpenarekin hasiko da ekitaldia. Ikus-entzunezkoak 13 minutuko iraupena du eta lehendabiziko aldiz erakutsiko da Deban. Geoparkeko Karstaren unibertsoa landu du Gorritibereak lan honetan, ikus-entzunezko iradokitzailea eginez, Geoparkearen barrualdeko munduaren konplexutasuna erakusten duten ñabardura txikiz betea. Zine zuzendaria bera bertan egongo da azalpenak emateko.

Ondoren, Geoparkearen lurrazpiko munduak ezkutatzen duen informazioa zuzenean ezagutzeko aukera izango dute bertaratzen diren herritarrek, Geoparkeko haitzuloak ikertzen diharduen lan-taldeko buru den Arantza Aranburu EHUko Irakaslearen eskutik. Hain zuzen, ikerlan hauek bultzatzeko, Geoparkeak lankidetza-hitzarmena sinatu du Aranzadi Zientzia Elkartearekin.

 

Geoparkea eta Aranzadiren arteko lankidetza-hitzarmena

Datorren ostiralean, hilak 22, goizez, aurkeztuko da prentsaurrean Geoparkearen eta Aranzadi Zientzia Elkartearen arteko lankidetza-hitzarmena. Ekitaldia Geoparkearen egoitzan izango da (Turismo Bulegoa: Ifar kalea, 4).