Kuttuna ekimenak balio izan du bertako negozioak zaintzeak edo bizirik mantentzeak duen garrantziaz jabetzeko

2020ko ekainaren 4aKuttuna ekimenak balio izan du bertako negozioak zaintzeak edo bizirik mantentzeak duen garrantziaz jabetzeko

Martxoaren erdialdean COVID-19ak eragindako osasun alarma indarrean jarri zen unean, merkataritza, ostalaritza eta negozio txikietan lanean ari zirenek (oinarrizko zerbitzu gisa izendatu zirenak salbu) bat batean euren jarduna eten behar izan zuten, halabeharrez. Denborak aurrera egin ahala, osasun krisia zena krisi sozial eta ekonomiko ere bihurtu zen.

Debako udalak, ahalegina egin du pandemia egoerak eragin duen krisialdi orokorrari irtenbide integrala emateko. Horrekin batera, laguntza zuzenak ere bideratu ditu sektore hauetako pertsonen zama ekonomikoa arintze aldera. 

Ekimen horietako bat, merkataritza, ostalaritza eta negozio txikiak laguntzeko Magnet kooperatibak garatutako Kuttuna.org plataformaren bonu-laguntzak izan dira. Debako udalak 20.000 euro bideratu ditu ekimenera, eta honen ondorioz, herritarrek erositako bonuei esker 100.000 euro bideratu dira aipatutako komertzioetara. 

Herritarrek erosi dituzten bonuek udalerriko (Deba-Itziar) 40 komertzio lagundu dituzte. Arropa dendetan eta ileapaindegietan egin dituzte herritarrek erosketarik gehienak, baina ez bakarrik horietan. Sustatu dira, halaber, iturginak, fisioterapia zentroak, loradendak, tabernak, jatetxeak…

Ibon Erraiz, Debalai Debako Merkatari eta Ostalarien Elkarteko presidentea da. Bere ustez, “bonuen ekimenak balio izan du udalerriko komertzioak sustatzeko, eta baita bertako negozioak zaintzeak edo bizirik mantentzeak duen garrantziaz jabetzeko ere, pentsamendu hori indartzeko, hain zuzen ere. Izan ere, alarma egoerak erakutsi digu komertzio eta ostalaritza establezimendu gehienak itxiz gero, herriak zein itxura triste hartzen duen (kaleak hutsik, herritarren arteko elkargune gutxiago, kalean bizitza gutxiago...)”.

Erraizen esanetan, “oso emozionantea izan da, denda oraindik itxita egonda ere, herritarrak bonuak erosten ari direla ikustea. Dirua aurreratu dute, konfiantza jarri dute gugan eta enpatiaz jokatu dute, ulertu dute zein egoera gogorra ari garen bizitzen. Benetan eskertuta gaude bezeroek eta Udalak agertutako jarreragatik, prestutasunagatik... bat-batean etorri den egoera zail honi buelta emateko motibazioa eta laguntza izaten ari da”.

Aurrera begira ere, uste du, kaleak eta udalerria bizirik mantentzea nahi bada, herritarrak, Udalak, dendariak... elkarlanean aritu beharko direla. “Bertako komertzioan ematen den zerbitzua, arreta, pertsonalagoa da eta elkar ezagutzeak asko balio du”, Debalaiko eledunaren ustez.