'Lehen aukera herria' herriko merkataritza sustatzeko kanpaina berria abenduaren 1ean hasiko da

2021/11/26
Herritarrak herriko merkataritza eta zerbitzu guneetan kontsumitzea bultzatzeko aurtengo 'Lehen aukera herria' kanpainak puntu programa bat jarriko du martxan. Puntuak erosketak egitean jasoko dira, baita itsasteko txartelak ere, erosleek pila ditzaten. Kanpaina abenduaren 1etik 31era egingo da, eta 2022ko urtarrilaren 8an bizikleta elektriko bat zozketatuko da parte hartzen duten pertsonen artean.

1.200 puntu banatuko dira izena eman duten 17 saltokien artean: Maxpe ileapaindegia, Maitane Boutique, Uzuri optika, Beti Eder estetika zentroa, Janire eta Maitane ileapaindegia, Sasoiko ekodenda, Masillo liburudenda, Ainitze fisioterapia, Estilo arropa denda, Itziar ileapaindegia, Lamariano oinetakoak, Gora Behera elikagai denda, Mugan arropa denda, Zuriñe Gredilla artisaua, Apain arropa denda, Ieraenea ekodenda eta Lizaso harategia.

Debako Udalak 12.000€ jarriko ditu puntutan. 10 euro baino gehiagoko erosketagatik puntu bat emango zaio erosleari, 10 euro bakoitzeko bat. Erosketa bakoitzeko puntu muga 4 puntu izango dira. 

Ekimenean parte hartzen duten establezimenduek haien produktuekin osatutako loteak egingo dituzte. Puntu kopuru bat beharko da loteak eskuratzeko. Herritarrak kopuru hori lortzen duenean, produktuen lotea jasoko du, hori izango da eroslearentzat onura, “oparia”.

16 urtetik 29 urte bitartekoei 2 puntu emango zaizkie 10 euroko erosketa bakoitzagatik, gazteek herrian erostea bultzatzeko.