Lizitaziora atera da Debako ondarea eta turismoa balioan jartzeko digitalizazio proiektua

2025ko ekainaren 18aLizitaziora atera da Debako ondarea eta turismoa balioan jartzeko digitalizazio proiektua

Proiektua Europako Suspertze, Eraldatze eta Erresilientzia Planaren baitan kokatzen da, eta turismo jasangarria bultzatzea du helburu. Digitalizazioak Debako ondarearen irisgarritasuna eta sustapena erraztuko du, egoiliarrei zein turistei onurak ekarriz.

Debako Udalak, Debegesaren bitartez, "Debako ondareari eta turismoari balioa emateko digitalizazioa" proiektuaren lizitazio prozesua jarri du martxan. Proiektu honek, teknologia berrien bidez udalerriko ondare eta baliabide turistikoen irisgarritasuna eta sustapena hobetzea du helburu eta Europako Suspertze, Eraldatze eta Erresilientzia Planaren baitan kokatzen da, Europar Batasunak NextGenerationEU programaren bidez finantzatuta.

Debako ondare turistikoa digitalizatzeko urratsa

Ekimenaren helburua da egoiliarrek eta turistek Debako ondarearekin elkarreragiteko duten modua eraldatzea, udalerriko elementu adierazgarrienak modu irisgarriagoan eta erakargarriago batean ezagutzeko aukera ematen duten soluzio digitalak eskainiz. Proiektuak Euskal Kostaldeko Unesco Geoparkearen bira birtual interaktibo bat sortzea hartzen du barne, 3Dn murgiltzeko plataforma batekin, multimedia baliabideak izango dituen mapa birtual georreferentziatuarekin eta pantaila interaktikoekin, bai turismo bulegoetan bai interpretazio-zentroetan.

Ezarriko diren teknologien artean, honako hauek nabarmentzen dira:

  • Pantaila interaktiboak gune estrategikoetan, hala nola turismo bulegoetan eta Debako Interpretazio Zentroan, non bisitariek denbora errealean inguruko ondare geologiko, kultural eta naturalari buruzko informazioa  kontsultatzeko aukera izango duten.

  • Ibilbide gidatu hibridoak, bisita fisikoak eta digitalak konbinatuko dituztenak. Turistak beren gailu mugikorren bidez edo bertan emandako gailuen bidez ibilbide horietara sartu ahal izango dira, interesguneei buruzko narrazio interaktibo bat esperimentatuz.

  • 360º-ko bisoreak eta multimedia-baliabideak, erabiltzaileek ondarea edozein lekutatik modu murgiltzailean esplora dezaten, hala nola formazio geologiko enblematikoak (Flysch, Algorri, Sakoneta, besteak beste) eta paisaia naturalak, adibidez, Deba-Zumaia itsasertzeko Paisaia Natural Babestua.

  • Errealitate birtualeko hiru dimentsioko digitalizazioa (RV), erabiltzaileei Debako leku adierazgarrienetan modu birtualean murgiltzeko aukera emango diena, azalpenez batez lagunduta, esperientzia turistikoa hobetuz. 

Proiektuaren helburua da bisita fisikoetarako tresna osagarri bat eskaintzea, erabiltzaileek ondare eta baliabide turistikoetaz Debara bisita egin aurretik, bitartean eta ondoren gozatu dezaten eta, aldi berean, tokiko ondarearen iraunkortasuna eta kontserbazioa sustatuz. Une honetan, proiektua lizitazio fasean dago, 133.867,14 euroko oinarrizko aurrekontuarekin. Lizitazioa ekainaren 25era arte egongo da zabalik.

"Gure ondarea eta Debako baliabide turistikoak digitalizatzea urrats garrantzitsua da gure eskaintza turistikoa modernizatzeko bidean. Europar Batasunak Berreskuratze Planaren bidez finantzatutako proiektu honek gure historia eta paisaia balioan jartzeko aukera emango digu, guztiontzat modu berritzaile eta jasangarrian eskuragarri jarriz. Gainera, gure herria bisitatzen dutenen esperientzia dibertsifikatzen eta aberasten lagunduko du, eta, aldi berean, helmuga turistiko adimendun eta jasangarri gisa kokatzen gaitu", amaitu du Alazne Txurruka Debako alkateak.