Next funtsetara aurkeztutako oinarrizko proiektua ezagutzeko aukera izan dute herritarrek

2022ko ekainaren 9aNext funtsetara aurkeztutako oinarrizko proiektua ezagutzeko aukera izan dute herritarrek

Pasa den ostiralean eta larunbatean, ekainaren 3an eta 4an, herritarrentzat informazio gunea antolatu zen udaletxeko arkupetan eta osoko bilkuren aretoan.

2021eko udazkenean Calbeton zumardiari buruzko partaidetza prozesuan herritarrek zumardia bera eta ingurua (loturak, oztopoak, irisgarritasuna, mugikortasuna…) aztertzeko eta ekarpenak egiteko aukera izan zuten. 

Informazio bilketa hori baliatuz, pasa den maiatzean, tren estazioa, merkatuaren eraikina, autobus geltokia eta Zumardiko kiosko arterako gunea barnebiltzen dituen eta Hirigintzako Batzorde mistoan landu den oinarrizko proiektua aurkeztu zuen Debako Udalak Europako Next Funtsetara. Diru laguntza hauen eskaera egitea izan da proiektu honen helburua, ez da, beraz, inolaz ere, definitiboa. 

200 lagundik gora gerturatu dira joan den asteburuko informazio gunera; Dagigun partaidetza gunean jada ohiko ditugun dinamizatzaileek oinarrizko proiektua azaldu eta herritarren ekarpenak jaso dira bertan, pixkanaka proiektu exekutiboa osatzeko asmoz.

Beste behin, dinamizatzaileen eta herritarren jarrera eskertu nahi du Udalak, kultura parte-hartzailea sustatzeko ahaleginean euren ekarpena egiten jarraitzeagatik. Bertaratu ezin izan zuten herritarrek jarraian dagoen bideoan ikusi ahal izango dute asteburuko saioetako bat.