Ostalarien kezkak eta beharrak entzuteko bilera egin du Debako udalak

2020/05/19
Debako udal gobernu taldeko ordezkariak, Gilen Garcia alkatea buru, udalerriko ostalarien ordezkaritza batekin batzartu dira. Jakina da pandemia egoera honen ondorioz, euren jardunean ondorioak izan dituztela eta Hego Euskal Herrian fase berria indarrean sartzearekin batera, terrazak zabaltzeko baimena ematen duena, zalantzak sortu direla ostalarien artean. Hori horrela, haien kezkak, galderak eta iradokizunak jasotzeko helburuarekin egin da lehen bilera hau.

Gutxi dira, gaur gaurkoz, gure udalerrian zabaldu diren gisa honetako negozioak. Baina, orain egiten eta gertatzen denak gerora eta gainontzekoengan eragina izango duelakoan, beharra ikusi da denon artean egoera aztertzeko. Elkarlanaren bidearekin jarraitzeko asmoa agertu dute alde guztiek, deseskalada deritzon prozesua elkarrekin egiteko, ahalik eta bermerik handienarekin, ostalarien beharrak eta herritar guztien osasunaren arteko oreka bilatzeko.