Herriko komertzio txikiak laguntzera 20.000 euro bideratuko ditu Debako udalak

Osasun alarma egoeran herriko sektore hau kaltetuenetako bat izan da eta ondoren ere izango ditu beregan ondorioak. Hau honela, Debako udalak, eragin ekonomiko negatiboa arintze aldera, hainbat neurri hartu ditu, zergen kobratzearen malgutzea, kasu. 

“Diru-laguntzak eta abarrekoak, udalaren gainetik dauden administrazioek kudeatzen badituzte ere, Debako udalak ahal duen neurrian ekarpena egin nahi du. Uste dugulako, lekuko merkataritza indartu behar dugula, gertukoa eta une berezi honetan hori zaintzea badagokigula. Kanpoko merkataritza azalera handiak edota internet bidez saltzen dituzten nazioarteko plataformek ez dituzte gure herrietan inbertsioak egiten, ez dituzte zergak ordaintzen, herrikoek, berriz, bai eta horien alde egin behar dugu, bai orain, eta baita aurrerantzean ere”, Gilen Garcia Debako alkatearen esanetan. 

20.000 euroko hasierako poltsa sortu du, hortaz, web plataformak bultzaturiko erosketa bonuetarako -konfinamendu egoera bukatzean eta dendak irekitzean edo zerbitzuari berreltzean erabili ahal izango dituzte herritarrek-, eta, horri esker, 100.000 euro iritsiko lirateke aipaturiko negozioetara. Horrek, itxita egon bitartean diru-sarrera batzuk izatea ahalbidetuko die aipaturiko negozioei. 

Hau honela, herritarrek erosten dituzten bonuen zenbatekoaren %20 diruz lagunduko du Debako udalak, beti ere, bonua 200 eurora artekoa bada -25 eurokoa da bonuen gutxieneko balioa-. Alegia, erosleak, 40 euroan eskuratuko luke 50 euroko bonua; edo, 160 euroan, 200 eurokoa. Bestetik, laguntza erosketa ezberdinetan banatu eta ahalik eta establezimendu kopuru handienera hel dadin, pertsonako 400 euroko muga ezarri da bonuak erosteko. Hala, erosketa bonua eskuratu gura duenak izena eman behar du www.kuttuna.org webgunean. Eta, ostean, txartela erositakoan, PDF formatuko fitxategi bat deskargatzeko aukera izango du -e-posta helbidean ere jasoko du eta uneoro eskuragarri izango du web plataforman-. Horixe bera izango da aukeraturiko establezimendua berrirekitzean hark eskainitako produktuen edo zerbitzuen trukean erosleak edo erabiltzaileak eman beharko duena. 

Establezimenduen atxikitzea 

Konfinamenduak eraginda itxita dauden herriko merkataritza, ostalaritza eta zerbitzu sektoreko establezimendu oro atxiki daiteke ekimenera. Horretarako, izena eman behar dute www.kuttuna.org webgunean, 'Merkataria zara?' atalean. Bertan, komertzioaren profilari dagozkion datuak bete beharko dira, ordainketa sistemarena salbu. Hasiera batean, bonuen balioaren %80 ordainduko die udalak establezimenduei, eta irekitzen direnean eta bezeroek erosketa bonuak erabiltzen dituztenean jasoko dute gainontzeko %20a. 

Hauek dira egitasmoarekin bat egin ahal izateko establezimenduek bete beharreko baldintzak: hamar langile baino gutxiagoko merkataritza, ostalaritza eta zerbitzu sektoreko establezimendua izatea, pertsonei begirako produktuak edo zerbitzuak eskaintzea eta konfinamenduaren eraginez itxita egotea. Bestetik, bonuak ezingo dira alkohola, tabakoa, loteria edo apustuak eta ibilgailuen erregaia erosteko erabili.

Debako udalak 620 430 069 telefono zenbakia eta turismoa@deba.eus posta elektronikoa jarri ditu zalantzak argitzeko edo alta prozesuan laguntzeko.