Debak 2025eko Bonu Kanpaina jarri du martxan tokiko merkataritza, ostalaritza eta zerbitzuak bultatzeko

2025ko azaroaren 11a

Udalak "Erosi Deban – Bizi Deban" lelopean abiarazi du kanpaina, udalerriko kontsumoa dinamizatzeko, 10.000 euroko inbertsioa bideratuz. Herritarrek 50 euroko bonuak 35 euroren truke erosi ahal izango dituzte azaroaren 14tik aurrera Turismo Bulegoan.

Debako Udalak "Erosi Deban – Bizi Deban" 2025 Bonu Kanpaina jarri du martxan, herritarrentzako deskontu handiko bonu bidez, udalerriko merkataritza, ostalaritza eta zerbitzuak dinamizatu eta bultzatzeko. 

Tokiko kontsumoa sustatzeko programa hau Debako ehun ekonomikoa indartzeko Udalaren konpromisoaren parte da, batez ere hurbileko merkataritzari eta tokiko establezimenduei laguntzea ekonomia jasangarriagoa eta hurbilagoa eraikitzeko giltzarria den testuinguru batean.

Kanpainaren ezaugarriak

Kanpainaren baitan 665 bonu jarriko dira salgai, eta azaroaren 14tik aurrera egongo dira eskuragarri Debako Turismo Bulegoan. Bonu bakoitzak 35 euroko prezioa izango du, baina benetako balioa 50 eurokoa izango da, 10 euroko hiru txartel eta 5 euroko lau deskontu txarteletan banatuta. 

Bonu bat erosi nahi dutenek Deban edo Urazamendi auzoan erroldatuta egon beharko dute, 16 urte baino gehiago izan beharko dituzte eta erosteko unean NANa aurkeztu beharko dute. Pertsona bakoitzeko bonu bakarra erosi ahal izango da, eta horiek erabiltzeko gehieneko epea abenduaren 15a izango da.

Udalak 9.975 euro bideratuko ditu kanpaina hau diruz laguntzeko, tokiko ekonomia indartzearen aldeko apustua berretsiz.

Establezimendu parte-hartzaileak

Kanpainan parte hartu ahal izango dute baldintzak betetzen dituzten udalerriko merkataritza-, ostalaritza- eta zerbitzu-arloko establezimendu guztiek. Parte hartuko duten establezimenduen behin betiko zerrenda azaroaren 14an argitaratuko da, eta egun horretan hasiko da bonuen salmenta. 

Kontsumo arduratsua eta orekatua egiteko deia

Udalak gogorarazi du kanpaina honen helburua dela tokiko ehun ekonomiko osoari laguntzea. Ildo horretan, Asier Urain Merkataritza, Turismo eta Ekonomia Sustapeneko zinegotziak adierazi du: "Bonu hauek Debako sektore guztiak indartzeko balio izatea nahi dugu: tokiko merkatutik hasi eta saltoki txiki, ostalaritza eta zerbitzuetaraino. Horregatik, debarrak bonuen erabilera arduratsua eta orekatua egitera animatzen ditugu, euren erosketak eta kontsumoak establezimendu mota ezberdinetan banatuz. Horrela, guztion artean, inpaktu handiagoa lortuko dugu eta gure tokiko ekonomia benetan indartuko dugu".