Debak Markos Gimenoren Karteletrak erakusketa jasoko du, sorkuntzari eta hizkuntza-jokoari egindako omenaldi kolektiboa

2025ko abenduaren 12a

Erakusketak 56 kartel ilustratu batzen ditu, Markos Gimenok sortutako euskarazko palindromoak oinarri hartuta, batzuk berak diseinatuak eta beste batzuk hogei bat artista eta lagunek eta ikusgai egongo dira, abenduaren 15etik 20ra, Musika Eskolako erakusketa gelan. Era berean, eta erakusketa honi amaiera emateko, abenduaren 20an, larunbata, Mursego artistak kontzertua eskainiko du, Markos Gimenoren polindromoetan oinarrituta eta Ispilu (h) ari ekimenaren baitan, 18:00etan, Agirre Jauregiko Ispiluen Gelan.

Debak Markos Gimenoren Karteletrak erakusketa hartuko du abenduaren 15etik 20ra bitartean Musika Eskolako erakusketa gelan. Erakusketa hunkigarria bezain berezia da, Markos Gimeno Vesga sortzaile anitzaren lana omentzen baitu; artista honek sorkuntza artistiko eta linguistikora bideratu zuen bere ibilbidea.

Erakusketa euskaraz sortutako palindromoetan oinarritzen da. Palindromoak ezkerretik eskuinera zein alderantziz berdin irakurtzen diren esaldiak dira, eta Markosek arte-forma bilakatu zituen. Bisitariak 56 kartel ikusiko ditu ibilbide bisual eta literario honetan, harrigarriak eta burutsuak diren egitura linguistiko hauei bizia ematen dietenak. Kartel batzuk Markosek berak diseinatu zituen, baina gehienak artistek eta lagunek egindakoak izan dira oraingoan sortzaile gisa, maitasunez eta miresmenez egindako omenaldi gisa.

Erakusketan 25 artista eta sortzaile baino gehiagok parte hartzen dute, besteak beste, Esteban Montorio “Monti”, Martin Loizate, Bigara, Klemente M. Corredera, Ares, Jose Antonio Azpilicueta eta Sonia García. Guztien artean, kartelismoaren indar bisuala eta hitz-jokoaren dotoretasuna uztartzen dituen omenaldi kolektiboa osatu dute.

Deban, gainera, erakusketak Debako Arte Eskolari lotutako artistek sortutako lanak biltzen ditu. Bertan Markosek berak ikasi zuen eta Tono, Ester Astarloa, Pipo edo Luis Zabala Mendiak bezalako ikaskideekin sormen harreman sendoa izan zuen.

Palindromogintzaz gain, Markos Gimeno musikaria eta aktorea izan zen eta azken urteetan, kalembur (hitzen arteko jolas fonetikoa) landu zuen euskaraz eta gazteleraz. Horregatik, Markos Gimenoren Karteletrak ez da erakusketa bat soilik, hizkuntzaren aberastasuna, sorkuntza kolektiboaren edertasuna eta euskal kulturaren egungo panoraman ezinbesteko figura baten ondarea deskubritzeko gonbidapena ere bada.

Mursegoren kontzertua erakusketaren amaiera gisa

Erakusketa honi lotuta, Mursego artistak kontzertua eskainiko du abenduaren 20an, 18:00etan, Agirre Jauregiko Ispilu Aretoan. Ekitaldi hau Markos Gimenoren palindromoetan oinarrituta dago, eta, beraz, amaiera emango dio artistaren omenezko erakusketari. Kontzertua Ispilu (h) ari ekimenaren barruan kokatzen da.