Albisteak
2022ko San Roke jaiak iragartzeko kartel lehiaketarako deialdia egin du Debako Udalak
Edonork parte har dezake, beti ere lan originalekin. Ekainaren 15eko 15:00ak baino lehen aurkeztu beharko dira lanak udaletxeko harrera bulegoan, astelehenetik ostiralera 10:00etatik 14:00etara.
Debako Udal Musika eta Dantza Eskolako izen-ematea zabalik dago
Ekainaren 17ra arte eman daiteke izena Debako Udal Musika eta Dantza Eskolan 2022-2023 ikasturterako. Bulegoko ordutegia astelehenetik ostegunera 14:00etatik 19:00etara, eta ostiraletan 10:00etatik 15:00etara.
Debako Antzerki astea maiatzaren 20tik 29ra egingo da aurten
Maiatzaren 20tik 29ra, bi astez, antzerkiz beteko ditu herriko kaleak Deban antolatutako jaialdiak. Urteak daramatza Goaz Antzerki Taldeak antzerki amateurraren jaialdi hau antolatzen, aurtengoa 35. edizioa izango baita. Debako Udalaren laguntza jaso du ekimenak.
Itzalpeko emakumeak argitara ekartzeko erakusketa zabaldu da gaur Deban
Gerra garaiko eta gerraosteko indarkeria jasan zuten emakume aitzindariak omentzea helburu duen 'Itzalpeko emakumeak' erakusketa ibiltaria zabaldu da gaur, maiatzak 19, Deban. Tartean dago Tene Mujika debarra ere. Ekainaren 26ra arte egongo da ikusgai Santa Maria elizako kalostran. Asteartetik larunbatera: 10:00etatik 14:00etara eta 17:00etatik 19:00etara, igande eta jai egunetan 17:00etatik 20:00etara. Bisita gidatuak egingo dira ekainaren 11n, 18an eta 25ean, 12:00etatik 13:00etara. Horietan izena eman behar da Udaletxeko harreran edo Turismo bulegoan.
Ostegun honetan emango dio hasiera Geoparkeak aurtengo Europako Geoparkeen Asteari
Ostegun honetan, hilak 19 hasi eta ekainaren 2ra bitartean, Europako Geoparkeen Astea ospatuko du Euskal Kostaldeko UNESCOren Munduko Geoparkeak Deban, Mutrikun eta Zumaian, hamahirugarren urtez. Ekimen hau Europan egun dauden 94 geoparkeetan egingo da aldi berean, tokian tokiko ondare geologiko eta natural aberatsa ezagutzera eman eta herritarrengan balio hauen kontserbazioaren inguruan kontzientzia pizteko helburuarekin.
LGTBIfobiaren Aurkako Nazioarteko Eguna: Adierazpen Instituzionala
1990eko maiatzaren 17an Osasunaren Munduko Erakundeak (OME) homosexualitatea gaixotasun psikiatrikoen zerrendatik kendu zuen, eta harrez gero LGTBIfobiaren aurkako eguna ospatzen da egun honetan.
Debako erromesen aterpetxea berriz zabaldu da
Bi urte baino gehiago egon ondoren, Debako GELTOKIA aterpetxea 2022ko apirilaren 25ean ireki zen, pandemiaren osteko mugak ezarrita, hartzen den jende kopurua erdira murriztuta, barrualdean distantziak mantenduta, etab. Berriz zabaldu denean etorritako lehen erromesa frantziar bat izan zen, Onintza Regil boluntarioak artatutakoa, argazkian ikus daitekeen bezala.
Tene Mujikaren lanak digitalizatu ditu Jakinek
Emakume Abertzale Batzaren mendeurrenean, eskuragarri jarri ditu bederatzi kideren obra osoa eta elkarteari buruzko hainbat lan Jakinek haren webgunean. Tartean dago Tene Mujika debarraren lana ere. Debako Udalak proiektua lagundu du.
Irakurketa Klubak bi saio egingo ditu uda aurretik
Uda hasi aurretik bi saio egingo dira Irakurketa Klubean, maiatzaren 25ean Bertold Arrietaren Gezurra berdaderoa liburuaz arituko dira Ostolaza Udal Liburutegian, Asier Serranoren gidaritzapean. Ekainaren 2an, berriz, Ainhoa Aldazabalek dinamizatuko du Astrid Lindgrenen Los hermanos Corazon de Leon liburua.
Maiatzaren 13ra arte eman daiteke izena Kolorez blai udalekuetan
Adinaren arabera banatutako bi txanda proposatzen dira Kolorez bai udaleku irekietarako. Bietarako izen-ematea datorren ostiralean, maiatzak 13, amaituko da.
Amatasuna eta feminismoa oinarri dituen 'M ama* eme* ume*' liburua aurkeztu dute egileek Deban
Erika Lagomak eta Estitxu Fernandezek feminismotik eta amatasunetik pentsatu eta gauzatutako liburua da 'M ama* eme* ume*' liburua, biak lotzen dituena. Amatasun bakarra ez dagoela-eta, hausnarketarako gonbita egiten du liburuak. 2021. urteko Tene Mujika saria jaso zuten bi lesakarrek liburua ontzeko. Maiatzaren 5ean aurkeztu dute liburua lehenik Donostian, prentsari, eta ondoren Debako udaletxean egin den ekitaldian.
Kaleak irribarrez beteko dira berriz maiatzaren 15eko Debarren Egunean
Azken bi urteotan, osasun pandemiak eraginda, ez da Debarren Eguna ohiko moduan ospatzeko aukerarik egon. Aurten, maiatzaren 15ean, azken bi urteotako nagiak kenduta kaleak pozez betetzeko deia egin nahi die herritarrei Debako Udalak.
Ondargain kafetegia eta hondartza inguruan kokatutako izozki etxolen ustiapenerako deialdia zabalik dago
Eskaintzak Debako Udaleko Harrera Bulegoan edo Debako Udaleko erregistro elektronikoan aurkeztu beharko dira, iragarkia Gipuzkoa AldizkarI Ofizialean argitaratu (apirilak 22 edo apirilak 23) eta hurrengo 30 naturaleko epean.
Aho batez onartu ditu Debako udalbatzak osoko bilkuran landutako gai guztiak
Maiatzaren 4an egindako osoko bilkuran aho batez onartu dituzte udalbatzako kideek gai zerrendan jasotako guztiak. Hala, lanpostuen egonkortzerako egindako proposamena onartu zuten udalbatzako kideek. Enplegu Publikoaren behin-behinekotasuna murrizteko premiazko neurriei buruzko abenduaren 28ko 20/2021 Legearen aurreikuspenean aplikatze aldera osoko bilkurak 2022. urterako aldi baterako enplegua egonkortzeko aparteko lan-eskaintza publikoa onartu du.
Deban ez dugu onartzen sexu askapenaren kontrako jarrerarik
Debako Udalak azken egunotan udalerriko puntu desberdinetan agertu diren sexu askapenaren kontrako mezuak arbuiatu nahi ditu. Pertsona gutxi batzuek egindako margotze horiek udalerriko gehiengoaren nahiaren kontrakoak dira. Bizikidetzaren alde gaude debarrak, eta bide horretan lanean ari da Udala ere. Horregatik, ez ditugu onartzen ez mezu eta ezta jarrera xenofoboak, sexu askatasunaren kontrakoak, gutxiengoen kontrakoak... ez Deban, ez beste inon ere.
Nagore Dorronsoro eta Rafa Bravo debarrek irabazi dituzte aurtengo 'Deba 100 hitzetan' literatur lehiaketaren lehen sariak
Cardenas Fundazioak eta Debako Udalak antolatzen duten 'Deba 100 hitzetan' literatur lehiaketaren VI. Edizioaren sariak banatu ziren ostiralean, apirilaren 29an. Deba du gaia lehiaketak. Haren historiarekin, paisaiarekin edota, zuzenean edo zeharka, harekin lotuta dagoen edozerekin zerikusia izan behar dute aurkezten diren lanek. Euskarazko modalitatean lehen saria (300 euro) Nagore Dorronsorok irabazi du eta gaztelaniazko modalitatean Rafa Bravok.
Istorioak kontatzeko zaletasunak badu etorkizuna Deban
Argi geratu da istorioak kontatzeko zaletasunak eta irakurzaletasunak etorkizuna bermatuta dutela Deban, Debako II. Euskarazko ilustrazio eta ipuin lehiaketako parte-hartzeak erakutsi duenez. Apirilaren 26an egin da Luzaro eskolak eta Debako Udalak elkarlanean antolatzen duten lehiaketaren bigarren edizioaren sari banaketa. Liburuaren Egunaren testuinguruan antolatutako azken ekitaldia gaur izango da, Deba 100 hitzetan lehiaketaren sari banaketa, hain zuzen ere. 19:00etan egingo da ekitaldia Kultur Elkartean
Maiatzaren 1ean hasiko da TAO denboraldia Deban
Maiatzaren 1ean hasiko da 2022ko TAO denboraldia, irailaren 30a bitartean. Bertakoen txartela etxean jasoko dute 2022ko urtarrilaren 1ean Deban erroldatuta dauden, ibilgailuaren zerga ordainduta duten eta zergak egunean dituzten herritarrek datozen egunetan.
Euskal Kostaldeko Geoparkeko itsaslabarren garbiketa auzolanean
Labarretan pilatutako hondakinak eta plastikoak biltzeko garbiketa datorren maiatzaren 29an egingo da, igandez, Deba-Zumaia Biotopoan, Elorriaga inguruko labarretan (Itziar-Deba).
Behin-behineko aldaketak autobus geltokian eta hondakinen bilketan
Lurra berritzeko lanak egingo dira apirilaren 25etik 29ra autobus geltokiko sarreran. Lanok autobus geltokia eta hondakinak biltzeko gunea behin-behinean lekuz aldatzea eragingo dute. Ahalik eta kalte gutxien eragiteko bi fasetan egingo dira. Eguraldiak laguntzen badu, eta ezusterik sortzen ez bada, apirilaren 29rako amaituko dira lanak.
Mutilen UCI junior mailako Gipuzkoako Klasika txirrindulari froga apirilaren 23an Deban
Amaikak bat taldearen 75. urteurrenaren testuinguruan Gipuzkoako Klasikoaren lehen etapa jokatuko da Deban, larunbatean, apirilak 23. Bigarrena, Donostiako Egia auzoan jokatuko da hurrengo egunean. Gipuzkoako Txirrindularitza Federazioak, Debako Amaikak Bat eta Donostiako Donosti Gain elkarteekin antolatu du. Debako Udalak herrian egingo den etapa lagundu du.
Eskolako Agenda 2030 lantzeko prozesuan udaletxean egon da Luzaroko ikasle talde bat
Hasi dira Luzaro eskolako ikasleak aurten Agenda 2030en barruan egingo dituzten lanekin. Lehorreko bizitza (landareak, animaliak, natur gune babestuak…) hartu dute lantzeko gaia aurten. Joan den astean udaletxean egon zen ikasle talde bat gai horri buruz dituzten galderen erantzunen bila. Maila desberdinetako ordezkari bana egon zen udaletxean, eta haiek izango dira euren ikaskideei informazioa helaraziko dietenak ondoren.
Liburuaren Eguna ospatzeko askotariko ekimenak antolatu dituzte hainbat eragilek elkarlanean
Apirilaren 23tik 29ra egingo dira Liburuaren Egunaren (apirilak 23) testuinguruko ekitaldiak. Adin eta gustu desberdinak dituzten pertsonak asetzeko moduko egitaraua prestatu dute herriko hainbat eragilek elkarlanean. Esaterako, poesia irakurraldia, haurren ipuin lehiaketaren sari banaketa eta azoka egingo dira.
Festetarako plazaren muntaketa hizketagai izan du udalbatzak ohiko osoko bilkuran
Martxoaren 31n bildu da Debako udalbatza ohiko osoko bilkuran. Hainbat gai landu ditu, esaterako ogasunari lotutako hainbat, San Roketan jartzen den plazaren inguruan ere aritu da, eta pentsionistek aurkeztutako mozioa onartu da.
Lehen urratsa eginda aurrera begira jarri gaitu Dagigun partaidetza prozesuak
Martxoaren 29an egin da Dagigun partaidetza gunearen lehen prozesuaren emaitzaren partekatze saioa. Udaletxeko osoko bilkuren aretoan bildu diren herritarrei eta eragileetako ordezkariei aurkeztu diete emaitza Gilen Garcia alkateak eta proiektuaren zuzendari Itziar Gonzalez arkitektoak. Haiekin egon dira, halaber, proiektuaren zuzendaritza Gonzalezekin partekatzen duen Igor Ahedo EHUko irakaslea eta gazteek osatutako dinamizatzaile taldeko kideak.
Errenta aitorpena euskaraz egiteko deialdia egin du Debako Udalak beste administrazioekin elkarlanean
Herritarrek administrazioarekin dituzten harremanak euskaraz izatea bultzatu nahi du UEMAk, eta horien artean, errenta aitorpena ere euskaraz egitea. Horretarako, aurreko urteetako bideari jarraituz, hautu hori sustatzeko kanpaina hasiko dute UEMAk eta hainbat erakunde publikok, elkarlanean, tartean Debako Udalak.
Egoera ahulean dauden pertsonen gizarteratzea eta laneratzea bultzatzen duen 'elkar-EKIN Lanean' programaren diplomak banatu dira gaur Debegesan
Gaur, osteguna, martxoak 31, 'elkar-EKIN Lanean' programan diplomak banatu dira Debegesan, Debabarreneko Garapen Agentzia; guztira, 19 emakumek eta 29 gizonek hartu dute parte.
Gaur zabaldu da Artzabalgo hilerri berria
Artzabalgo hilerria gaur, martxoak 25, eguerdian zabaldu da. Udalbatza osatzen duten hiru alderdietako ordezkariak, gai honetan lanean aritu diren udal langileetako batzuk eta herritarrak egon dira bertan. Gilen Garcia alkateak eskerrak eman dizkie gai honekin lanean aritu direnei, hala nola, batzordeari.
Euskarazko aisialdi eskaintza osatzeko 'proposatu ikastaro bat'
Hurrengo ikasturteko 'Gozatuz aisialdia euskaraz' egitasmoaren programa osatzeko herritarrei intereseko dituzten ikastaroak proposa ditzaten eskatu nahi die Udalak. Apirilaren 8ra arteko epean jasoko dira proposamenak Udal liburutegian, Udaletxeko harreran, Turismo bulegoan eta Gaztelekuan jarriko diren esku-orrietan. On-line ere egin daiteke, lotura honetan: https://forms.gle/419E7NSprfQc1N6j7.
Zahartze aktiboa eta osasungarria nahi duzu?
Eman izena CITA-alzheimerren ikerketa berrian, bizitza ohitura osasungarrien eta eta faktore kardiobaskularren kontrolaren bidez narriadura kognitiboa prebenitzeko.